E sarò quel giorno a rente
al me Dio, l’Onipotente,
vedarò alor el so squardo
sì, mi spero in quel traguardo!

Sensa oci, sensa cor
voi andar dal me Signor
sensa pele, sensa un rene
sensa sangue ne le vene.

E Lu alora el me dirà
col so far de bon papà:
“Ndò èlo el corpo che t’ho dato?
tuto intero mi t’ho fato!

Proprio qua davanti a mi
te presentito così?
Dime, dai, la to rason
de sifata condission.”

Gh’era zò un poareto
ch’el pativa drento a un leto
e gò dà alora un rene
par sleviarghe un po’ le pene.

E gò dà a un desgrassiado
con el fisico malado
tuto el sangue che podèa,
altrimenti lu el morea!

E a un bocia ch’el reclama
ch’el vol vedar la so mama
i me oci a lu no darghe?
L’era un torto da no farghe!

Anca el cor fra no tanto
i lo usa par un trapianto:
mi de mi no gò più gnente
ma i lo gà la pora gente.

Ma Signor, scusè l’ardir
la licensa del me dir,
ma a la fine, cossa vuto,
anca ti t’è dato tuto.

Scusa, seto, se ho copià
da quel fiol che t’è mandà;
sì, da Ti ho imparà l’amor
come Ti, son donator!

E a ‘sto punto el gran sovrano
el se alsa dal so scrano
con ‘na man el me fa ‘n segno
e mi entro nel so regno!

Era un sogno o realtà?
No, son vivo: gò sognà.
Ma in ste robe qua ghe credo
anca se mi ancor no vedo.

L’è ‘sta qua la fede vera:
fin che semo su la tera
in ‘sto mondo de dolor
ragionemo un po’ col cor!

Femo alor un po’ più bei
sti du giorni a quei fradei
che i gà oci tristi e muti
e da lagrime ormai suti!

Vedaremo finalmente
el soriso in tanta gente
e alor sto mondo qua
forse in mejo el cambiarà!